Միջոցառում` նվիրված երկրաշարժի 25-ամյակին

Դեկտեմբերի 7-ին Վանաձորի Կարլեն Ղարաքեշիշյանի անվան թիվ 1 արհեստագործական ուսումնարանում տեղի ունեցավ միջոցառում` նվիրված 1988թ. երկրաշարժի 25 -ամյակին:Միջոցառման ընթացքում ուսումնարանի սաները հանդես եկան տարբեր բանաստեղծություններով ու երաժշտական կատարումներով: Նրանք հիշատակեցին 25 տարի առաջ կատարված երկրաշաժը` խոսելով դրա հետևանքների ու ավերածությունների մասին: Ինչպես նշում է ուսումնարանի տնօրեն Կարեն Ղարաքեշիշյանը`միջոցառումը ուսուցողական բնույթ էր կրում և նպատակ ուներ այժմյան սերնդին ծանոթացնելու հայ ժողովրդի հետ տեղի ունեցած աղետին:«Ուզում ենք, որ այսօրվա սերունդը երբեք չտեսնի այն պահերն ու օրերը, որ ապրել է հայ ազգը:Մենք նրանց ուզում ենք  հիշեցնել անցյալը, հիշեցնել, որ տարիներ առաջ հայերը կորցրին իրենց տները և տարիների ձեռքբերումը»,-նշեց Կ.Ղարաքեշիշյանը:

Միջոցառմանը, որը կազմակերպվել էր ուսումնարանի աշխատակազմի և սաների կողմից, ներկա էին բազմաթիվ հյուրեր`մանկավարժներ, ծնողներ և այլք:

Վանաձորի զբաղվաժության կենտրոնի տնօրեն, արհեստագործական ուսումնարանի խորհրդի նախագահ Արա Առաքելյանը նշեց. «Նման միջոցառումները հիշատակի միջոցառումներ են: Երկրաշարժից արդեն 25 տարի է անցել: Այդ ամենը մոռանալ հնարավոր չէ, բայց պետք է հիշողությունների վրա հենվելով`կառուցենք մեր ապագան: Կյանքը շարունակվում է: Պետք է մեր երիտասարդները պայքարեն, ստեղծագործեն և արարեն»:

Հրդեհի հետևանքները Գուգարք համայնքում

Նոյեմբերի 24-ին հրդեհ է բռնկվել Լոռու մարզի Գուգարք համայնքում,որի հետևանքով անօթևան է մնացել 6 ընտանիք՝թվով 25 մարդ:

Գաղտնիքի կամուրջը Վանաձորում

Նոյեմբերի 8–ին Գաղտնիքի օրվա առթիվ երիտասարդները դեպի «Կիրովական» հյուրանոց տանող կամրջին վստահեցին իրենց`գաղտնիքներով և երազանքներով լեցուն կողպեքները, իսկ բանալիները նետեցին գետը: Այս նոր և ինքնատիպ նախաձեռնության հեղինակը Մանե Պապյանն է: «Սա նոր գաղափար է: Ծնվել է 90–ականների վերջերին և 2000-ականներից նոր սկսել է ակտիվություն ունենալ: Ես այն տեսել եմ Լատվիայում և ցանկացա Վանաձորում ևս իրականացնել»,-նշեց Մ. Պապյանը:                                                                                                                    
Մասնակիցները ևս ողջունեցին այս գաղափարը`ցանկություն հայտնելով, որ այն շարունակական բնույթ կրի: «Շատ հետաքրքիր նախաձեռնություն է:Ուրախ եմ, որ Վանաձորում նույնպես այսպիսի վայր կա: Լավ կլինի, որ շարունակական բնույթ կրի, և որոշ ժամանակ հետո այս վայրը սիրելի ու գրավիչ դառնա բոլորի համար»,-նշեց Աննա Չոբանյանը:

Հավելենք, որ կողպեքներ կարող են կախել բոլորը ցանկացած պահի:Իսկ նախաձեռնության հեղինակն էլ ավելացրեց, որ այսուհետ կողպեքներ կկախվեն ոչ միայն Գաղտնիքի օրվա առթիվ, այլև Վալենտինի և Սուրբ Սարգսի տոներին :) 

«Անոնիմուսների երթ» Երևանում

Նոյեմբերի 5-ին «Ազգային Միացյալ նախաձեռնության» ղեկավար  Շանթ Հարությունյանը Ազատության հրապարակում հայտարարել էր հեղափոխություն սկսելու մասին և իր՝ մոտ 100 աջակիցների հետ Գայ Ֆոքսի դիմակներով «Անոնիմուսների երթ» էր սկսել դեպի նախագահի նստավայր: Սակայն ոստիկանները Մաշտոցի պողոտայում կասեցրել էին երթը, որի հետևանքով բախումներ էին տեղի ունեցել, պայթյուններ հնչել: Ոստիկանները բերման էին ենթարկել 37 ակտիվիստների, այդ թվում՝ Շանթ Հարությունյանին և նրա որդուն: Բախումների հետևանքով տուժել է 16 մարդ, այդ թվում 8 ոստիկան, որոնցից մեկը դանակահարվել է:

            Վանաձորում կատարեցինք սոցհարցումներ՝ պարզելու, թե որքանով են մարդիկ տեղեկացված Երևանում կատարված ցույցերի մասին:

            Վլադիմիր Սիմոնյան

_Գրեթե միշտ և ամբողջությամբ տեղեկացվում եմ իրադարձություննրի մասին, այդ թվում և վերջին՝ Երևանում կատարվող ցույցերին և դրական եմ վերաբերվում դրանց:

            Հովիկ Շեկոյան, տնտեսագետ

_Մանրամասն ծանոթ չեմ, սակայն մասամբ տեղեկացվել եմ լրատվամիջոցներից և անկեղծ ասաց «դիրս եկավ»:

            Գայանե Հարությունյան, ուսուցչուհի

_Չեմ արդարացնում ամենը, որովհետև ի վերջո մարդիկ են տուժում:

            Նազիկ Զաքարյան, 50 տարեկան գործազուրկ

_Արդարացնում եմ ցույցի մասնակիցներին և նրանց գործունեությունը: Ինչ անի խեղճ ժողովուրդը:

            Քրիստինե Կոլյան, 34տ., նկարիչ

_Չգիտեմ, թե ինչի համար են արվում այդ ցույցերը: Մտածում եմ, որ անիմաստ ու անհասկանալի է, այդ ամենից անմեղ մարդիկ են տուժում:

Լուսանկարները և տեսանյութը՝ 1in.am և photolur.am

                                                                                                     Տաթև Եղիազարյան
                                                                                                     Նարինե Բաղդասարյան
                                                                                                     Ռոզա Մարուքյան

Կայացավ «Education USA» կրթական ցուցահանդեսը

Նոյեմբերի 4–ին «Արմենիա Մարիոթ» հյուրանոցում տեղի ունեցավ «Education USA» կրթական ցուցահանդեսը, որը կազմակերպվել էր «Ամերիկյան խորհուրդներ» կազմակերպության և ԱՄՆ դեսպանատան անմիջական աջակցությամբ: Ցուցահանդեսը, որին մասնակցում էին ամերիկյան 20 համալսարաններ և անգլերեն լեզվի տեղական 8 կենտրոններ,միտված էր հանրությանը ծանոթացնել ԱՄՆ կրթական համակարգին: Ինչպես նշեց ցուցահանդեսի կրթական խորհրդական Շուշաննա Աբովյանը` ցուցահանդեսը ոչ միայն ուսանողների, այլև դասախոսների և մյուս ցանկացողների համար է. «Ցուցահանդեսը բաց է բոլոր նրանց համար, ովքեր հետաքրքրված են իրենց ուսումը ԱՄՆ-ում շարունակելով»:

Նշենք,որ ցուցահանդեսի ներկաների թիվը հասնում էր 1200–ի, որը, ըստ կազմակերպիչների, կանխատեսելի էր: «Ուսանողների և մարդկանց այսպիսի հոսքը ցույց է տալիս, որ մարդիկ իսկապես հետաքրքրված ու շահագրգռված են բակալավրի, մագիստրոսի կամ ավելի բարձր ասպիրանտուրական կրթություն ստանալու»,- նշեց «Ուսանող դեսպան» ծրագրի Լոռու մարզի դեսպան Նունե Հովհաննիսյանը:

Հավելենք,որ ցուցահանդեսի ընթացքում տեղի ունեցավ վիճակահանություն, որին մասնակցում էին բոլոր նրանք,ովքեր նախապես գրանցվել էին օնլայն տարբերակով: Որպես մրցանակ վիճակահանության հաղթողները անգլերեն լեզվի կենտրոնների կողմից ստացան նվեր քարտեր` անգլերեն անվճար դասընթացների մասնակցելու:

Ներխուժել են «Էկոբասի» տարածք

Անհայտ անձիք նոյեմբերի 2-ին ներխուժել են Վանաձոր քաղաքի

կենտրոնական գրադարանի հարևանությամբ գտնվող «Էկոբասի» տարածք`պառճառելով զգալի վնասներ: «Էկոբասի» աշխատանքային թիմի կարծիքով այս ամենը կազմակերպվել է հատուկ: «Պատահական ոչինչ չկա, որովհետև ծաղկամանների կեսը չկա, շախմատի և շաշկու քարերը չկան, բանկաները ջարդված են լրիվ կոլաժներով»,-նշեց թիմի հիմնական անդամ Անահիտ Կարապետյանը:

«Էկոբասը» բաց հասարակական տարածք է, որը պատկանում է գրադարանին: «Մենք հիմնականում այդ տարածքը բացում ենք առավոտյան և երեկոյան փակում, որպեսզի գրադարանին վնաս չհասցվի»,- նշեց Ա. Կարապետյանը:

Հավելենք, որ «Էկոբասը» ստեղծվել է հուլիս-օգոստոս ամիսներին 50 հոգանոց աշխատանքային թիմի կողմից:

Լուսանկարները` Անահիտ Կարապետյանի

Վանաձորի թիվ 24 միջն. դպրոցում աշխորհրդի նախագահ են ընտրում

Հոկտեմբերի 17-ին Վանաձորի թիվ 24 միջն. դպրոցում տեղի ունեցավ 2013-2014 ուստարվա աշխորհրդի նախագահի ընտրություն:Ընտրությանը մասնակցում էին 8-ից 12-րդ դասարանների աշակերտները:Կատարվեց փակ,գաղտնի քվեարկություն,որի արդյունքում աշխորհրդի նախագահ ընտրվեց 12-րդ Բ դասարանի աշակերտուհի Գոհար Գասպարյանը:

Լոռու մարզում կրկին Բերքի տոն է

Շնորհավո՛ր տոնդ,Վանաձո՛ր

Հոկտեմբերի 5-ին մեծ շուքով նշվեց Լոռու
մարզկենտրոնի`Վանաձորի օրը:
Տոնի առթիվ Վանաձոր էին
ժամանել բազմաթիվ հյուրեր:Պատվավոր հյուրերի շարքում էին Բաթումի քաղաքապետը,Երևանի քաղաքապետ Տարոն Մարգարյանը,երկակի օլիմպիական չեմպիոն Ալբերտ Ազարյանը և այլք:
Օրվա առթիվ Վանաձորում բազմաթիվ միջոցառումներ էին կազմակերպվել:Կեսօրին Հայքի հրապարակում տեղի ունեցավ ֆլեշմոբ,որը կազմակերպվել էր <<Լոռու երիտասարդ սերունդ>>հկ-ի կողմից: Երեկոյան սկսվեց տոնական համերգը,որին ելույթներով հանդես եկան ոչ միայն Վանաձորի երգիչ-երգչուհիներն ու պարային համույթները,այլև Հայաստանի երգի պետական թատրոնի երիտասարդ կատարողները:

Նոր և բարեկարգ Արցախ պուրակ

Հուլիսի վերջից երիտասարդների նախաձեռնությամբ սկսվել են Արցախ պուրակի բարեկարգման աշխատանքները, որին աջակցում է նաև Վանաձորի քաղաքապետարանը:Այժմ աշխատանքները ավարտական փուլում են գտնվում.վերականգնվում են հատակը և նստարանները:Վանաձորի գլխավոր ճարտարապետ Տիգրան Պապանյանը նշեց, որ նախատեսվում է աշխատանքները մինչև քաղաքի տոնը ավարտել, քանզի ուսանողները նույնպես խոստացել են աջակցել:Վերջինս ասաց նաև,որ հանրավոր է պուրակում տեղադրվեն քաղաքապետարանի պատվիրած նստարաններից:<<Խնդիրը պահպանությունն է:Արդյոք այդ նստարանները տեղում կմնան,թե՞կտանեն>>,-նշեց Տ.Պապանյանը:

Նա նշեց նաև,որ տեղադրման դեպքում նստարանների պահպանությունը

պետք է հանձնել ինչ-որ մեկին :

 Պուրակում  կատարվել են նաև ծաղկապատման և 

եզրաքարերի վերականգնման աշխատանքներ:Աշխատանքների իրականացման համար հանգանակվել է 910 հազար դրամ:Ավելացնենք, որ հնարավոր է պուրակի տարածքում լինի WIFI գոտի:

Հանդիպում Էդմոն Մարուքյանի հետ

Սեպտեմբերի 28-ին ՀԿ կենտրոնի դահլիճում տեղի ունեցավ հանդիպում ԱԺ պատգամավոր Էդ. Մարուքյանի հետ:Այն կազմակերպել էր Հայաստանի ԱՄՆ  շրջանավարտների ասոցիացիայի Լոռու մարզային համակարգող Նունե Հովհաննիսյանը:Հանդիպումը,որին ներկա էին ԱՄՆ շրջանավարտներ,<<Ամերիկյան կենտրոնի>>ակտիվ մասնակիցներ և ուսանողներ,նվիրված էր ՀՀ անկախության 22-ամյակին:

Հանդիպման ընթացքում երիտասարդները Էդ.Մարուքյանի հետ խոսեցին այս տարիների ձեռքբերումների ու բացթողումների,ԱՄՆ շրջանավարտների,քաղաքական և հասարակական տարբեր խնդիրներ մասին:Փոքր-ինչ իր կենսագրության և գործունեության մասին խոսելուց հետո պատգամավորը պատասխանեց երիտասարդների բոլոր հարցերին:

ԷԴ. Մարուքյանը խոսեց նաև Հայաստանի`Մաքսային միության հետ ինտեգրման մասին:<<Ինձ հայտնի չէ` ինչու ենք մտնում:Կան տարբեր ենթադրություններ:Օրինակ`եթե չմտնենք,տնտեսական  ծանրագույն պայմանների մեջ կհայտնվենք>>:

Պատգամավորը մեր երկրի ապագան տեսնում է միայն Եվրոմիության հետ ինտեգրման պարագայում.<<Ես հույս եմ փայփայում,որ Եվրոպայի դռները մեզ համար փակված չեն>>:

Նշենք,որ նման միջոցառումները պարբերաբար են անցկացվում:Դրանց նպատակը տարբեր տարիների ԱՄՆ փոխանակման երկարաժամկետ կամ կարճաժամկետ ծրագրերի շրջանավարտներին և հասարակության ակտիվ մասնակիցներին համախմբելն է:<<Առաջնային խնդիրը ԱՄՆ շրջանավարտների ձեռք բերած գիտելիքների և հմտությունների փոխանցումն է`ի շահ հասարակական բարօրության>>,-նշեց հանդիպման կազմակերպիչ Ն.Հովհաննիսյանը:

                                                                                                

Ի՞նչ խնդիրներ կան Վանաձորում,որոնք լուծման կարիք ունեն

Վերջերս հարցում կատարեցի Վանաձորի փողոցներում: Իմ հարցին,թե ինչ խնդիրներ կան Վանաձորում, բնակիչները տվեցին հետևյալ պատասխանները.

Մանյա Մելքոնյան, աշխատում է գեղեցկության սրահում

_Բոլորն էլ լուծման կարիք ունեն: Ժողովրդի ապրելակերպն է վատ:Ուշ ժամերին մարդիկ մնում են փողոցներում: 8:30-ից հետո վարորդները երևի իրենց ցանկությամբ են աշխատում: Ոչ մի այգի բարվոք վիճակում չէ: Բացի այդ աղբը շուտ չեն տանում,ցելաֆոն-մելաֆոն սաղ քամին քշում է: Թող աշխատատեղեր բացեն երիտասարդների համար: Ի՞նչ գործ ունի իմ տղան,որ բանակից գա ու ընկնի Ռուսաստանի քուչեքը: Սա ամենակարևորն Է:

Նազարյան Գոհար

_Կարելի է ավելի շուտ հարցնել`ինչ խնդիրներ չկան:Առաջին հերթին մաքրության խնդիրը, որը վատ վիճակում է գտնվում:

Պետրոսյան Համլետ, օպերատոր-մոնտաժող

_Առաջին հերթին աշխատատեղերը և ճանապարհների խնդիրը: Ես ապրում եմ Ներսիսյան նրբանցքում և հիշում եմ, որ 2003թ.-ից առկա է այդ խնդիրը. քարքարոտ փողոցները դեռ չեն սարքվել:Նաև կա ծայրամասերի աղբահանության խնդիր:

Ջուլիետա Միկինյան,ուսուցչուհի

_Էնքան շատ են խնդիրները: Ինձ թվում է` դրանք չեն կարող լուծվել, որովհետև չեն հետևում: Օրինակ մաքրություը, ճանապարհների անբարեկարգության խնդիրը:

Արամ Խաչատրյան

_Փողոցների ասֆալտապատման և մեքենայով երթևեկության խնդիր կա:Ցանկալի կլիներ, որ բացի կենտրոնական փողոցից ասֆալտապատվեին նաև մյուս փողոցները:

Ալիխանյան Ս.

_Մաքրության և ճանապարհների հարցը: Բոլոր փողոցները անմխիթար վիճակում են: Ես մեքենա ունեմ, և երթևեկելը շատ դժվար է:

Ողջույն սիրելի ընթերցող

                                                   


Ես Ռոզա Մարուքյանն եմ:Սովորում եմ ՎՊՄԻ-ի Լրագրության բաժնում:

Իմ այս բլոգում ես կներկայացնեմ ոչ միայն լուրեր և նորություններ,այլև կանդրադառնամ հանրությանը հուզող հարցերին ու խնդիրներին:
Հուսով եմ կայցելեք իմ բլոգ և կհետևեք կատարվող բոլոր իրադարձություններին:
                                                                                             
                                         Սիրով Ռ.Մարուքյան